مصر

أقولكم إيه حكايتي مع مصر
أنا صحيح ماتولدتش في مصر ولا عشت طفولتي في مصر
بس أنا مصرية في الصميم
و بحب بلدي، أصل بلدي دي مش حكومة ولا أرض
مصر دي أمي و أبويا إلى مدفون في ترابها
مصر هي عيلتي و أهلي
مصر هي البلد الوحيده إلى بنتميلها
مصر إلى أنا ماكنتش عايزة أسافر و أسيبها عشان حاسة و مقتنعة إن لو مش أنا و أنت و إنتي حنبنيها نعمرها ماحدش حيعمرها ويخليها أحسن
مصر مش الحضارة بتاعت الفراعنة ولا هي أهرامات و نيل
مصر هي أوقاتنا الحلوة و أفراحنا مصر هي أحزان و أيامنا الصعبة
مصر حلم جميل موجود جوا كل واحد فينا ببلد جميل آمن
إحنا جيل مظلوم
جيل تربى إنو ماييحلامش و مش بيسدأ إن بكرة ممكن يكون أحسن
جيل ملهوش حلم يجمعه
أنا صحيح مش قادرة أنزل أقف في الشارع
بس أنا أقدر أربي بنتي صح
أقدر أفهم الدستور بتاعي عشان أفهم حقي صح
أقدر أحلم ببكرة في حق و عدل
أقدر أبطل خوف من الدنيا
أقدر أفكر و أشتغل و أعمل حاجة حلوة عشان بكرة يبقى حلو
إحنا نمنا كتير و سكتنا كتير و دلوقتي آن الأوان إننا نقف يد واحدة وحنا متأكدين إن إحنا حنغير و نتغير
الله أعلم المرحلة إلى جاية حتكون عاملة إزاي بس أكيد مش حتبقى سهله
بس ده مش مهم المهم إننا جاهزين و مستعدين ليها

ولكل واحد أو واحده واقفين في الشارع من يوم 25 يناير بدعيلكم بالسلامه و بالقوه و بدعيلكم علشان إنتو بتدافعو عن حقي و حق أهلي في بلدي
ربنا معاكم يصبركم و يقويكم

2 Comments